सातारा : आपल्या लाडक्या चारचाकी गाडीसाठी 'VIP' किंवा आवडीचा नंबर हवा असेल, तर सातारकरांसाठी एक महत्त्वाची संधी चालून आली आहे. सातारा प्रादेशिक परिवहन कार्यालयाने (RTO) चारचाकी वाहनांसाठी 'MH-11 DZ' ही नवीन नोंदणी मालिका येत्या ३ फेब्रुवारी २०२६ पासून सुरू करण्याचा निर्णय घेतला आहे.

महत्त्वाचे वेळापत्रक आणि प्रक्रिया:

जर तुम्हाला ०००१ ते ९९९९ या मालिकेतील कोणताही आकर्षक क्रमांक हवा असेल, तर खालील बाबी लक्षात ठेवा:

अर्ज स्वीकारण्याची तारीख: ३ फेब्रुवारी २०२६.

वेळ: सकाळी १०:०० ते दुपारी २:०० वाजेपर्यंत.

अर्ज कोठे करावा: प्रादेशिक परिवहन कार्यालय, सातारा.

आवश्यक कागदपत्रे: विहित नमुन्यातील अर्ज आणि आवश्यक शासकीय शुल्काचा धनाकर्ष (Demand Draft).

क्रमांक वाटपाचे नियम:

१. थेट वाटप: जर एखाद्या क्रमांकासाठी फक्त एकच अर्ज आला असेल, तर तो क्रमांक त्याच दिवशी संबंधित अर्जदाराला दिला जाईल.

२. लिलाव पद्धत: एकाच क्रमांकासाठी एकापेक्षा जास्त अर्ज आल्यास, अर्जदारांना दुसऱ्या दिवशी दुपारी २ वाजेपर्यंत बंद लिफाफ्यात जादा रकमेचा धनाकर्ष सादर करावा लागेल. जो सर्वाधिक बोली लावेल, त्याला तो क्रमांक मिळेल.

३. मुदत: एकदा क्रमांक आरक्षित झाला की, पुढील १८० दिवसांच्या आत संबंधित वाहनाची नोंदणी करणे बंधनकारक आहे.

टीप: आरक्षित क्रमांकासाठीचे शुल्क भरल्यानंतर इतर अर्जदारांचे धनाकर्ष त्वरित परत केले जातील, असे आरटीओ प्रशासनाने स्पष्टकेले आहे.